قصيدة الأرجوانية.
علي مكتبها شوية رسومات
لواحد مات بنيكوتينه
وواحد كل ال حواليه حابينه
وواحد بيحب يعمل كل شيء علي طبيعته حتي ساب شعره منكوش
ويبقي واحد هي مش عارفة حبته ولا محبتهوش
هدوء فيروز يكسره صوت القهوة تسأل نفسها هو انا بعد ده كله ينفع أهوي؟!
تسهر ترسم صور ليه
يسهر يكتب الشعر ليها
يدعي الله يخليها
تدعي يكون ليها
يكملوا العلاقة في الخِفي
ياريت الصمت اكتفي
أو كسروه
ياريت الطريق يعيش ويكملوه
ياريت اللي اتقال سراً في الليل
يتقال علناً في نهاره
الاتنين احتاروا
الاتنين اختاروا الحب بحيرة
من ضمن ألوانه الكتيرة
مش دايماً يا حضرات كل تاخيرة وفيها خيرة
مش كل العلاقات أفضلها التأخير
أصل " بحبك" مش محتاجة تفكير
خافت من المستقبل مش منه
خسارة كل المجروحين من الماضي برضو بيحنوا
أوقات الفراق بيكون بغياب الصوت مش الصورة
ونبان أقوي من الصخر ولا نبينش الحتة المكسورة
بنخرج من العلاقات وجزء منا مخرجش
كل ما أصحي الصبح ألاقيكي في نسمة هواء
في كوباية الشاي
إزاي أوصفلك يا حبيبي إزاي
قبل ما أحبكِ كنت إزاي
اشوف صورتها اكتب الشعر
تفوت عليها أيام ف قلبي ويغلي السعر
ابص ل عنيها بلهفة من شاشة الموبايل
اه بشوفك بعين عيل.
أنا قلبي داب
أنا عقلي غاب
أنا رمحي صاب
أنا ساموراي وعايد
أنا بالي شارد
وفيا باتت
وفيا سابت تواريخ بذكري معرفتهاش
وعليها حاجات مفهمتهاش
وأقول لنفسي وإيه يعني مفيش حاجة بتيجي ببلاش
وعاملة فيا كل شيء من ولا شيء
رايقة ولايقة وساكنة العين
أنا معرفش خدتني لفين
يا نجمة مغطياها سحابة
يارب يتشال من علي قلبك الغيم
نهاية القصيدة مش زي طلعتها
خسارة محروم من طلتها
وأنا بكل ما فيا وبكل ما فيها والله حبيتها
خسارة...
ولا يوم هقول نسيتها
ولا يوم تقول حباه!.
مادتنيش فرصة الحياة أفهِمها
ومدتهاش فرصة الحياة تنساه!.
احمد رجب.
التصنيفات :
مبادرة دعم الكُتاب المٌستقلة
عظمه والله العظيم
شغل عالي